周街都買到嘅再造紙廁紙！

話說有朋友發現惠康超市推出左自家品牌「特惠牌」"No Frills" 嘅再造紙廁紙，並且發表左佢嘅用後感，於是我都盡快去買返卷來試下。

外觀，認住棵樹。

「百份百再造紙」

FSC 認證，中文稱「可回收」同英文 "RECYCLED" (已回收) 似乎有D 歧意，我估應該信英文吧。

紙張顏色略為帶灰暗，紙面上有D 暗花。

價錢：$17.9/十卷，比好多其他款式都要平

用後感：試過用來抹鼻同抹PATPAT，感覺同其他用開嘅品牌無乜大分別，唔覺得特別的粗糙。

其實市面上仲有另一個叫做「綠柔」嘅再造紙廁紙品牌，不過只有幾間環保商店同有機店先有得賣，要買的話都不太方便。雖然惠康係兩大連鎖超市之一，對其他小店嘅生存帶來威脅，但如果以再造紙廁紙取代市面其他品牌所標榜嘅「100% 原木漿」廁紙，其環保嘅效果實在太大，喺咁嘅「利誘」之下，我實在唔介意惠康行使佢半壟斷嘅「霸權」，將呢種產品推廣到家家戶戶都使用！

講返轉頭，惠康肯繼綠柔後推出呢種環保產品，做行業嘅先行者，並且在定價上無加上綠色嘅「附加費」，將目標客群定為普羅大眾，而非中產以上環保意識較高嘅群體，本身已經係值得一讚嘅策略。希望以後可以吸引到其他品牌跟隨，生產更多再造紙產品。
至於好多人都關心嘅衛生問題，兩年前消委會對所有廁紙做嘅產品測試結果顯示(新聞稿在此，詳細報告有版權，不便在此貼出)，當年惠康品牌嘅另一種2-ply environmental 廁紙的確有超標嘅細菌數量，但當中並不包含大腸菌群和兩種致病菌 - 金黃葡萄球菌和溶血性鏈球菌。至於今次嘅產品衛生方面是否合格，本人對有關生產過程和檢測制度都不太熟悉，無從評論。但從一個普通消費者角度看，惠康作為一個知名品牌無理由讓不合格的產品出售；又如果大家對其他品牌的原木漿廁紙都有信心的話，閣下又是否對其生產和檢疫程序有充足了解？由此看來，對再造紙廁紙衛生程度應該是有信心的，不過對此有所擔心亦係可以理解的，尤其大眾對再造紙回收再造的過程都只是一知半解，大眾容易以日常所見的回收過程跟再造紙廁紙聯想起來，所以有關生產商應該加強宣傳和生產/ 檢測的透明度，以增強公眾對此類產品的認知同信心。