粵普之爭的小感受

對於近來香港和大陸的粵普之爭，我之前都談過不少，現在還有一些感想，故想加上一個註腳：

一，7月13日個集星期二檔案講香港人講鄉下話的情況，值得一睇，圍頭話都仲係第一次聽到有人講，怪不得之前去元朗吉慶圍參觀，老人家唔講客家，而講歪歪地的白話，原來就係圍頭話；

二，香港就係一個咁奇怪的地方，白人老外來到住成世都唔使學中文，黑皮膚老外來到成世都學唔好中文，黃皮膚本地人卻想仔女唔好學中文! 梁啟智兄的文章可供參考。我估香港華人不少的上一代或兩代都唔係講粵語，對粵語無甚歸屬感，只係社會需要而講，所以唔覺得有義務保護粵語。不過如果社會開始關心保育舊建築、自然景觀，呢股風氣亦應可以帶到保護語言之上。

三，香港的法定語言為兩文三語，但偏偏學校只會教兩文兩語 (甚至連粵語都趕出學校者亦有，參考德望學校)，餘下的粵語絕大多數人都無機會學，小弟好彩在中大有機會上左3堂 “語精”，先至識得粵語拼音，難道母語就唔需要學?

四，國內向下一代強力推普，尤其在校內，校外又係咁向公眾宣傳，實際效果就係小朋友用方言的機會同能力大減，成人亦少左機會為方言注入新內容，潛台辭就係要削弱大人細路講方言的能力，試問咁仲唔係要慢慢消滅方言? 溫水煮蛙而已! 最後變成點? 好彩的可能好似台灣的閩南話咁，只可活躍於鄉間/ 南部，但一種語言如果唔可以存在於大城市同年輕人之間(未去過高雄，唔知多唔多年輕人講閩南話呢? 但連 “海角七號” 去到墾丁都係講國語，我無寄於希望了)，則生命力大減矣!

五，國內主要官員由外省人擔任並沒有問題，反而係好事，吸納四方人才，也可避免在地方盤根。保護方言不需要本地人任地方官，也不需要外來官做騒咁學本地話，只要佢任內的措施唔好壓縮本地人講本地話之空間就好了，就好似英國人管香港，甚少港督識中文，華人半 “被逼” 學好英文，但英國人無要求我地校內家內任何時間都要講英文，已經係對使用方言的德政。